ఏషా బ్రాహ్మీ స్థితిః పార్థ నైనాం ప్రాప్య విముహ్యతి | స్థిత్వా స్యామంతకాలే అపి బ్రహ్మనిర్వాణమృచ్ఛతి ||

పదచ్ఛేదం

ఏషా – బ్రాహ్మీ – స్థితిః – పార్థ – న – ఏనాం – ప్రాప్య – విముహ్యతి – స్థిత్వా – అస్యాం – అంతకాలే – అపి – బ్రహ్మనిర్వాణం – బుచ్ఛతి

ప్రతిపదార్థం

పార్థ = ఓ అర్జునా ; ఏషా = ఇది ; బ్రాహ్మీ = బ్రహ్మనిష్ఠ ; స్థితి = స్థితి ; ఏనామ్ = దీనిని ; ప్రాప్య = పొంది ; న, విముహ్యతి = (యోగి ఎప్పుడు) మోహాన్ని పొందడు ; అంతకాలే = మరణ సమయంలో ; అపి = కూడా ; అస్యాం = ఈ బ్రాహ్మీస్థితిలో ; స్థిత్వా = ఉండి ; బ్రహ్మనిర్వాణం = బ్రహ్మానందాన్ని ; బుచ్ఛతి = పొందుతున్నాడు.

తాత్పర్యం

“ పార్థా ! దీనినే ‘ బ్రాహ్మీస్థితి ‘ అంటారు; ఈ జ్ఞానం పొందినవారు మోహాన్ని పొందరు; మరణకాలం లోపల, యెవడైతే ఈ జ్ఞానాన్ని సాధిస్తున్నాడో, వాడు బ్రహ్మనిర్వాణపదాన్ని పొందగల్గుతున్నాడు. ”

వివరణ

ఇంద్రియ విషయాలను, కోరికలను, అహంకార, మమకారాలను

సంపూర్ణంగా త్యజించి …

నిందాస్తుతి, సుఖదుఃఖాది ద్వంద్వాలలో సమత్వం కలిగి కర్మాచరణ చేస్తూ …

దేహభావాన్ని విడనాడి ఆత్మభావంలో స్థిరపడిన వాడికి …

తనకంటే భిన్నంగా ఏదీ లేదు అన్న ఆత్మజ్ఞానం సిద్ధిస్తుంది.

బ్రహ్మానందాన్ని పొందుతాడు …

బ్రాహ్మీస్థితిని పొందుతాడు …

బ్రహ్మనిష్ఠను పొందుతాడు.

బ్రహ్మనిష్ఠ అన్నది జ్ఞానయోగం యొక్క అంతిమ స్థితి.

బ్రహ్మనిష్ఠ స్థితిని పొందినవాడు ఇక మోహాన్ని పొందడు. 

మరణ సమయంలో కూడా బ్రహ్మనిష్ఠ చలించదు.

మరణ సమయంలో కూడా బ్రాహ్మీస్థితిలో ఉండి …

బ్రహ్మానందాన్ని పొందుతాడు.

బ్రహ్మనిష్ఠ వున్నవాడికే యథార్థ జ్ఞానం కలుగుతుంది.

యథార్థ జ్ఞానం వల్ల “ వున్నది వున్నట్లు ” గా “ లేనిది లేనట్లుగా ” తెలుస్తుంది.

అంతకన్నా ఇక కావల్సిందేముంది?