| భగవద్గీత 3-23
“ యది హ్యహం న వర్తేయం జాతు కర్మణ్యతంద్రితః | మమ వర్త్మానువర్తంతే మనుష్యాః పార్థ సర్వశః || ” |
పదచ్ఛేదం
యది – హి – అహం – న – వర్తేయం – జాతు – కర్మణి – అతంద్రితః – మమ – వర్త్మ – అనువర్తంతే – మనుష్యాః – పార్థ – సర్వశః
ప్రతిపదార్ధం
హి = ఎంచేతంటే ; పార్థ = అర్జునా ; యది = ఒకవేళ ; జాతు = ఎప్పుడైనా ; అహం = నేను ; అతంద్రితః = జాగరూకుడనై ; కర్మణి = కర్మలలో ; న, వర్తేయం = ప్రవర్తించకపోతే ; మనుష్యాః = మానవులు ; సర్వశః = అన్నిరకాల ; మమ = నా యొక్క ; వర్త్మ = మార్గాన్ని ; అనువర్తంతే = అనుసరిస్తారు
తాత్పర్యం
“ అర్జునా ! ఒకవేళ ఎప్పుడైనా నేను జాగరూకుడనై కర్మలలో ప్రవర్తించకపోతే, మానవులు అన్ని విధాలా నా యొక్క మార్గాన్నే అనుసరిస్తారు. ”
వివరణ
ఇంకా కృష్ణుడు అంటున్నాడు …
“ నేను అజాగరూకుడనైతే అందరూ ఆ అజాగ్రత్తలోనే పడిపోతారు ” కానీ,
“ నేను ఎప్పుడూ జాగ్రత్తతోనే ప్రవర్తించాను ” …
“ నేను ఎప్పుడూ సరిగ్గానే వ్యవహరించాను ” …
ఎంచేతంటే, “ ఇతరులు నన్ను ‘ గురువు ’ గా స్వీకరించారు ” కనుక.
“ ఇతరులకు ‘ గురువు ’గా వుండడానికి నేను ఇష్టపడ్డాను ” కనుక.
“ ‘ గురువు’ అన్న బాధ్యత తీసుకున్నప్పుడు సరిగ్గా వుండాలి ”.
“ తనకు నచ్చినట్లుగానే చేసే విధం వున్నప్పుడు ‘ గురువు బాధ్యత ’ స్వీకరించకూడదు ”.
ఉత్తములు అజాగ్రత్తగా ఉంటే లోకమంతా అజాగ్రత్తలో పడిపోతుంది.
అలా జరిగితే దానికి కారణం ఆ ఉత్తములే అవుతారు.
లోకం అజాగ్రత్తలో పడినప్పుడు ఆ గురువు ఉత్తముడు కాదన్నమాట.
కనుక, ఉత్తములు అత్యంత జాగరూకులుగా ఉండాలి.
అత్యంత జాగరూకులుగా ఉన్నప్పుడే వారు ఉత్తములవుతారు.
ధ్యానయోగులు, ఆత్మజ్ఞానపరాయణులు చేసే కర్మలు
అందరికీ ఆదర్శప్రాయంగా ఉండాలి …
అందరూ సులభంగా గ్రహించేటట్లుగా ఉండాలి.
మాటలూ, చేతలేకాదు … ఆలోచనలు కూడా
ఇతరుల మీద ప్రభావాన్ని చూపిస్తాయి.
ఆలోచనలను సక్రమంగా ఉంచుకోవాలి.
ఎల్లప్పుడూ సకారాత్మకంగానే ఆలోచించాలి … మాట్లాడాలి … కర్మలు చెయ్యాలి. నకారాత్మక ధోరణిని విడనాడాలి.
దేనిలో ఎవరికి నిష్ణాత ఉందో దానిని
మాత్రమే వారు ఇతరులకు నేర్పించపూనాలి.
తమకు ఇంకా నిష్ణాత అలవడలేదని
తెలుసుకున్నవారు …
నడిపించడానికి సిద్ధపడకూడదు.
ఇంకా నేర్చుకోవడానికే సిద్ధపడాలి …
నడపబడడానికే సిద్ధపడాలి …
ఎంతో శ్రద్ధతో నడక నేర్చుకోవాలి …
ఆ తర్వాతే నేర్పించ ఉపక్రమించాలి.
Recent Comments